Shpërthimi me tritol i ndodhur një dite më parë në Shkodër, tronditi qytetin verior në orët e vona të mbrëmjes.
Lënda eksplozive iu vendos garazhit të një shtëpie në pronësi të biznesmenit Sadetin Kiri, i cili dyshohet të jetë edhe shënjestra e atentatit.
Por fatmirësisht, nga shpërthimi nuk pati të lënduar në njerëz, por vetëm dëme materiale.
Sakaq, nga hetimet e kryera deri më tani nga policia, dyshohet se shpërthimi ka ardhur si paralajmërim për shkak të borxheve që djali i biznesmenit iu kishte marrë personave të ndryshëm.
Kjo pasi, Fatjon Kiri është një emër i njohur në Shkodër, për shkak të angazhimit të tij si futbollist me ekipin e Tërbunit të Pukës.
Për policinë, kjo është pista kryesore ku po hetohet momentalisht, ndërsa për identifikimin e autorëve, janë marrë pamjet filmike të kamerave të sigurisë të bizneseve aty pranë.
